شروط استخدام الموقع
آخر تحديث: سبتمبر 2026
الخلاصة في 3 نقط
- الموقع ده بيعرض شغلنا وبيديك تقدير سعر مبدئي.
- التقدير مش عرض سعر ملزم. العرض الملزم بيتكتب بعد المعاينة.
- محتوى الموقع ملكنا، بس تقدر تقتبس منه بالإشارة للمصدر.
الصفحة دي عن استخدام الموقع، مش عن عقد الشغل
اللي مكتوب هنا بيخص تصفّحك للموقع واستخدامك للحاسبة والمحتوى. اتفاق تنفيذ الشغل حاجة تانية تماماً، وبيتكتب في عرض السعر بعد المعاينة، وفيه البنود والمقاسات والمدة والدفعات. مفيش حاجة على الموقع ده بتعتبر تعاقد، ومفيش حاجة بتتوقّع هنا.
إيه اللي الموقع بيعمله وإيه اللي مش بيعمله
بيعمل:
- بيعرض الخدمات والتصاميم والتعريفة
- بيديك تقدير تكلفة مبدئي من أرقام إنت بتكتبها
- بيوصّلك بينا على واتساب أو التليفون
مش بيعمل:
- مفيش حجز أونلاين
- مفيش دفع أونلاين
- مفيش عقد بيتوقّع على الموقع
الحاسبة
الرقم اللي بيطلع من الحاسبة تقدير مبدئي محسوب على تعريفة معلنة وبيانات إنت كتبتها. مش عرض سعر، ومش ملزم لأي طرف.السعر النهائي بيتحدد بعد معاينة الموقع وبيتكتب في عرض سعر بالبنود. الفرق بين التقدير والعرض النهائي وارد، وبيزيد كل ما بيانات الشقة تكون أقل تفصيلاً.
نطاق الشغل
إحنا بنعمل الجبس والمارموكس والمعجون. النقاشة والكهربا بنرشّحلك حد شغّال، وبتحاسبه إنت مباشرة وإحنا مبناخدش عمولة. شغله مسؤوليته وشغلنا مسؤوليتنا.
اللي بنعمله:
- تأسيس الشاسيه الحديد (مجاري وزوايا وأوميجا)
- تركيب ألواح الجبس بأنواعها
- بيت النور والرونات والأشكال الهندسية
- القواطع والجدران
- تجليد الحوائط والمكتبات والأرفف الطايرة
- معجون الفواصل والفايبر
- المارموكس بورد وعزل الحمامات والمطابخ
- تركيب الماجنيتيك تراك
- تحديد أماكن السبوتات والليد على الرسمة
- صيانة وإصلاح الأسقف القائمة
اللي مش بنعمله:
- سحب الكهربا وتوزيع علب الماجيك — بنرشّحلك كهربائي وبتحاسبه مباشرة
- البطانة والصنفرة والدهان النهائي — بنرشّحلك نقاش وبتحاسبه مباشرة
- توريد الدهانات — بتشتريها إنت حسب ميزانيتك
- الكرانيش الكلاسيك والصُرر — مش من شغلنا. الفيوتك بنعمله — محمد الدشتي هو اللي بيمسكه — والكرانيش المشغولة لأ.
- تسليم مفتاح من الطوب الأحمر — إحنا متخصصون في الجبس والمارموكس
الاتفاق بيغطي البنود المكتوبة في عرض السعر بس. أي بند مش مكتوب مش داخل. والصنايعية اللي بنرشّحهم بتحاسبهم إنت مباشرة، وشغلهم مسؤوليتهم، وإحنا مبناخدش عمولة من حد.
الأسعار
التعريفة معلنة على الموقع ومحدّثة في أغسطس 2026. بتتراجع كل 6 شهور، وقابلة للتغيير من غير إخطار. السعر بيتثبّت في عرض السعر المكتوب بس — وبعد ما يتكتب، هو اللي بيحكم مش اللي على الموقع.
الشغلانة الصغيرة
سعر المتر المعلن محسوب على شغل بمساحة معقولة. تحت حد معيّن، التكاليف اللي مالهاش علاقة بالمساحة — النزول والمعاينة ونقل الخامة والعدة ويوم الصنايعي — بتفضل زي ما هي، فمتر الشغلانة الصغيرة بيطلع أعلى. الحد ده بيتحدد بعد المعاينة.
الرقم نفسه مش مكتوب هنا لأنه لسه مش متأكد منه، ورقم مش متأكد منه بيتشال مش بيتكتب. لو الشغلانة عندك صغيرة، ابعت المقاسات وهنقولك على طول هي داخلة في المتر ولا محتاجة تسعير مستقل.
الملكية الفكرية
كل محتوى الموقع — النصوص والمقالات والرسومات والحاسبة ونظام التصميم — ملك مصر ديزاين. الاقتباس مسموح بالإشارة للمصدر ورابط للصفحة. النسخ الكامل أو إعادة النشر التجاري ممنوع.
تعديل الشروط
ممكن نعدّل الصفحة دي. تاريخ آخر تحديث ظاهر فوق، وهو المرجع لأي نسخة.