سياسة الخصوصية

البيانات اللي بنجمعها فعلاً

لما تملا فورم التواصل، بيوصلنا اللي كتبته إنت: الاسم،رقم الواتساب، المحافظة، و — لو كتبتهم —نوع الشغل والمساحة وتفاصيل إضافية.

ومعاهم بيتبعت تلقائياً، من غير ما تكتبه:

• الصفحة اللي بعت منها
• الموقع اللي دخلت منه لو جاي من رابط برّه (referrer)
• مصدر الإعلان لو جاي من إعلان (utm)
• كود التقدير اللي طلع من الحاسبة، أو كود التصميم اللي كنت شايفه، لو موجود

الحاجات دي بتخلّينا نعرف الرسالة جاية منين ونرد عليك في سياقها. مفيش فيها اسمك ولا رقمك — دول اللي إنت كتبتهم فوق.

الحاسبة حاجة تانية خالص. الأرقام اللي بتكتبها فيها بتفضل في متصفحك إنت. مابنشوفهاش أبداً إلا لما تبعتها بنفسك — بالفورم أو بزرار واتساب.

حاجات بتتخزّن في متصفحك

الموقع بيستخدم تخزين المتصفح (localStorage) في تلات حاجات: كود الطلب بتاعك، والتقدير اللي عملته في الحاسبة عشان مايضيعش لو قفلت الصفحة، ومصدر الإعلان لو جيت من واحد. دي بتقعد على جهازك ومابتتبعتش لأي حد لوحدها. لو مسحت بيانات المتصفح، بتتمسح معاها.

مين بيشوف بياناتك غيرنا

دي كل الأدوات اللي بيمر عليها أي جزء من بياناتك، ومالهاش رابعة:

• Meta (فيسبوك وإنستجرام) — أداة قياس بتشتغل لما الإعلانات تكون شغّالة. بتسجّل إنك زرت صفحة أو ضغطت زرار، وبتربط ده بحسابك على المنصات دي لو كنت مسجّل دخول. ولما تبعت طلب، بيوصلهم إن حد بعت — رقمك بيتبعت مشفّر (hash) مش الرقم نفسه، عشان يعرفوا الإعلان اللي جاب المحادثة.
• Vercel — بتستضيف الموقع وبتشغّل الفورم. زي أي استضافة، بتشوف الطلبات الجاية للسيرفر.
• Google Sheets — الطلبات بتتخزّن في شيت خاص بينا، مقفول على حسابنا.

مفيش أدوات تحليلات تانية على الموقع. مفيش Google Analytics ولا أي أداة قياس زوّار غير اللي فوق.

قد إيه بنحتفظ بيها

عملاء اشتغلنا معاهم فعلاً: مدة المشروع وسنة بعده، عشان لو رجعت لينا في حاجة نلاقي تفاصيل شغلك.

طلبات ما اتحوّلتش لشغل: المدة لسه بتتحدد. لحد ما تتحدد وتتكتب هنا، تقدر تطلب المسح في أي وقت وهيتنفّذ من غير سؤال.

حقوقك

من حقك تشوف بياناتك، أو تعدّلها، أو تمسحها، أو تسحب موافقتك على الإعلانات.

الطريقة واحدة وبسيطة: ابعت رسالة واتساب على0110 144 8140 وقول اللي عايزه. مش محتاج نموذج ولا سبب.

الأطفال

الموقع ده مش موجّه لأي حد أقل من 18 سنة، ومابنجمعش بيانات عن قصد من أي حد في السن ده.

الكوكيز

الموقع بيستخدم كوكيز إعلانية من Meta وبس، ولما الإعلانات تكون شغّالة. مفيش كوكيز تحليلية تانية. لو مش عايز ده، تقدر تستخدم مانع إعلانات أو تقفل التتبّع من إعدادات المتصفح — والموقع هيفضل شغّال عادي: الحاسبة والفورم وزراير الواتساب كلها بتشتغل من غير الأدوات دي.

القانون

الموقع بيتعامل مع البيانات الشخصية في إطارقانون حماية البيانات الشخصية المصري رقم 151 لسنة 2020.